Bonan tageron, saluton!
En septembro mi laboris pri enkonduko de ŝanĝoj en la blogo, sed krom tio mi afiŝis videon en YouTube:

Kaj videon por subtenantoj:

Suno, steloj kaj mi

Mi ankaŭ skribis artikolojn. Ĝis la Nova Jaro ilin eblos trovi en la retejo, kaj post la Nova Jaro nur sur mia paĝo en Boosty. Ĉar mi iom post iom translokas la publikon al mia paĝo en Boosty, ankaŭ ligiloj al artikoloj kondukos tien. La artikoloj estos libere alireblaj; por legado eĉ ne necesas registriĝo.

• Du jaroj sen paŭzo – tempo por pripensi…
• Mia unua libra rekomendo (kaj ĝi ankaŭ konatigis min kun Esperanto)
• Ni elektas enkondukon!
• Sezonoj: kalendaro kontraŭ astronomio?

Antaŭe mi ĉiumonate skribis pri muziko kaj filmoj, kiujn mi povus rekomendi, kaj ankaŭ decidis aldoni artikolojn pri libroj kaj komputilaj ludoj, kaj mi skribas ankaŭ pri diversaj temoj. Ĝenerale nun mi miksos temojn por artikoloj. Ĉiuokaze vi ne restos sen moderna enhavo de mi.

Kaj mi ankaŭ malfermis filmklubon sur mia paĝo en Boosty. Mallonge pri tio, ni kune elektas filmon, kiun mi spektos, poste mi skribos artikolon pri ĝi kaj ni kune diskutos pri la filmo elektita de vi!
Kaj por oktobro mi ankaŭ planis komunan spekton en rekta elsendo de la unua hororfilmo en Esperanto «Inkubo»!
Detaloj ĉi tie:
Ni elektas filmon por spektado kaj diskuto!
Aliĝu! Ĝi estas senpaga!

Pri teknikaj aferoj:
Mi volas eniri la Novan Jaron 2027 kun renovigita blogo, kaj por ke tio ne okazu subite, mi komencas enkonduki novaĵojn jam nun. Pri ĝuste kiaj ŝanĝoj mi parolas? Kiel aspektos la blogo post la Nova Jaro? Mi planas lasi ĉe mia laboro nur tiujn ilojn, kiuj helpas evoluigi mian kreivon, por ne plu disĵeti atenton al pluraj platformoj kaj koncentri ĝin al kreivo kaj publiko.

Restos:

1. Mia Jutuba kanalo. Mi daŭre kreos subtekstojn en pluraj lingvoj. Eble ĝi vide fariĝos pli alloga.
2. Paĝo en Boosty – tie mi gvidos la komunumon, dividos novaĵojn, skribos artikolojn, okazigos voĉdonadojn kun libera aliro, kaj daŭre provizos privilegiojn al miaj subtenantoj.
3. Instagram – mi komencis per ĝi mian blogistan vojon kaj tie jam estas varma kaj amata de mia publiko.

Ne restos:

1. Telegram-kanalo
2. Mia retejo (ĝi restos kiel vizitkarto kaj mia ankro en la interreto)
3. Mi ĉesos aperi en X/Twitter, Mastodon, Facebook, TikTok.

Tio rilatas al malalta aktiveco de la publiko, al granda tempokonsumo, kaj ankaŭ al tio, ke memreklamado ĉesis funkcii. Mia celo estas kolekti grandan (laŭ mezuroj de Esperantujo) publikon ĝuste en YouTube kaj ne disĵeti atenton al tiuj platformoj, kie ne estas aktiveco.

Dume mi daŭre skribos tiajn raportojn por mia retejo ankaŭ venontjare.

Kaj kompreneble indas mencii unu tre malĝojan eventon, pri kiu mi eksciis en septembro… La retejo Mia Vivo ekde la Nova Jaro fermiĝas… Tre domaĝe! Kutime mia mateno komenciĝis per legado de la afiŝfluo. Detalojn vi povas legi ĉi tie: https://www.miavivo.net/?status%2F1-1-1790244787%2F

La kialojn mi komprenas, sed tio ne fariĝas pli facila! Ĝi nur montras malĝojan dinamikon en Esperantujo…

Sed mi volas fini per pozitiva noto! Mi komencis aktive gvidi la paĝon en Boosty, kaj vi helpas min pri tio! Vi ne povas imagi, kiel mi ĝojas pro viaj komentoj kaj ŝatoj! Tio tre vigligas mian agadon. Daŭrigu tiel!

Jen la resumoj! Mi deziras al vi bone pasigi oktobron kaj resti kun mi!

Kore,
Ksenik!